Brunatæknifélag Íslands – Íslandskafli SFPE
1. Nafn.
1.1 Nafn félagsins er Brunatæknifélag Íslands, hér á eftir nefnt Brunatæknifélagið. Brunatæknifélagið er vettvangur áhugafólks um brunamál og er auk þess að hluta til Íslandskafli Society of Fire Protection Engineers (skammstafað SFPE), og ber heitið SFPE Iceland Chapter. Varnarþing félagsins er í Reykjavík.
2. Tilgangur félagsins er:
2.1 Að örva og stuðla að framförum í brunafræðum, forvörnum og slökkvitækni ásamt öllum tengdum greinum og örva hugmyndir, sem eru líklegar til að koma að gagni í tengslum við ofangreind markmið, bæði fræðilega og verklega, fyrir meðlimi Brunatæknifélagsins og samfélagið í heild.
2.2 Að beita sér fyrir fundum, skoðanaskiptum og útgáfum um mál sem horfa til framfara um ofangreind markmið.
2.3 Að gera allt til að árangur náist um ofangreind markmið.
2.4 Að afla Brunatæknifélaginu nýrra og hæfra félaga með fjölbreyttan bakgrunn á sviði brunamála.
3. Aðild að Brunatæknifélaginu.
3.1 Allir geta fengið aðild að Brunatæknifélaginu, sem geta sýnt fram á tengsl sín við brunamál eða tengd málefni og verða þeir sjálfkrafa meðlimir að Íslandskafla SFPE. Fullgild aðild að heildarsamtökum SFPE er óháð aðild að Brunatæknifélaginu/SFPE Iceland Chapter og sótt er um slíka aðild beint til stjórnar SFPE.
3.2 Þeim sem uppfylla inntökuskilyrðin skv. gr. 3.1 má veita aðild að Brunatæknifélaginu samkvæmt ákvörðun stjórnar, en stjórn setur sér verklagsreglur varðandi skilyrði um inntöku nýrra félaga í Brunatæknifélagið (sjá gr. 6.4). Brunatæknifélagið getur jafnframt gert einstaka meðlimi Brunatæknifélagsins eða sérhvern annan aðila sem hefur veitt sérstaka tæknilega aðstoð, að heiðursfélaga.
3.3 Upphæð árgjalds til Brunatæknifélagsins skal ákveðin á aðalfundi. Gjalddagi þess skal vera 1. maí ár hvert en eindagi sex vikum síðar.
3.4 Standi meðlimur ekki skil á árgjaldinu í tvö ár samfellt fellur aðild hans að Brunatæknifélaginu niður, enda sé honum tilkynnt um slíkt með fyrirvara.
3.5 Sé nýr meðlimur tekinn inn í Brunatæknifélagið á síðustu þremur mánuðum fyrir aðalfund, skal fyrsta árgjald hans gilda fyrir mánuðina þrjá og árið á eftir. Brunatæknifélagið gefur út á þessu tímabili.
3.6 Þeir sem hafa verið meðlimir í 15 ár samfellt, geta ef þeir kjósa, greitt tvöfalt árgjald 1. maí árið eftir að þeir ná 60 ára aldri, og verið síðan meðlimir af sömu gráðu til æviloka án þess að greiða frekari árgöld.
4. Fundir.
4.1 Aðalfund skal halda í apríl ár hvert eða sem næst þeim tíma og skal boða til hans með að minnst tveggja vikna fyrirvara með sannanlegum hætti. Aðalfundur er löglegur, sé rétt til hans boðað. Einfaldur meirihluti mættra félagsmanna ræður úrslitum mála. Á aðalfundinum skal leggja fram endurskoðaða reikninga Brunatæknifélagsins til samþykktar. Reikningsár Brunatæknifélagsins er almanaksárið. Á aðalfundi tekur nýkjörin stjórn og skoðunarmaður reikninga við embætti, enda hafi þau verið kjörin samkvæmt gr. 5.
Dagskrá aðalfundar skal vera sem hér segir:
- Kosning fundarstjóra og fundarritara
- Skýrsla stjórnar lögð fram
- Reikningar lagðir fram til samþykktar
- Lagabreytingar
- Ákvörðun félagsgjalds
- Kosning stjórnar
- Önnur mál
4.2 Stjórnin ákveður aukaaðalfundi eftir þörfum. Skriflega tilkynningu um þá skal senda öllum félögum eigi síðar en 7 dögum fyrir fundinn. Í tilkynningunni skal fundarefnis getið og engin önnur mál skal taka fyrir eða gera samþykktir um á fundinum.
4.3 Ef ritari fær í hendur beiðni um aukaaðalfund undirritaða af tíu meðlimum, skal hann strax boða til slíks fundar með ekki minna en 7 daga og ekki meira en 21 dags fyrirvara. Um fundarboð fer skv. grein 4.2.
4.4 Sérhver félagsmaður viðstaddur félagsfund skal hafa eitt atkvæði, óháð stöðu, en ef atkvæði falla jafnt skal formaður Brunatæknifélagsins fá eitt viðbótaratkvæði þ.e. oddaatkvæði.
4.5 Allir félagar í Brunatæknifélaginu hafa atkvæðarétt á aðalfundi Brunatæknifélagsins.
5. Stjórn félagsins
5.1 Á aðalfundi ár hvert skal kjósa stjórn og skoðunarmann reikninga. Formann skal kjósa beinni kosningu. Í stjórn sitja fimm menn, formaður, varaformaður, ritari, féhirðir og einn meðstjórnandi. Stjórnin skiptir með sér verkum. Almenn regla skal vera að núverandi eða fyrrverandi stjórnarmeðlimur taki við embætti formanns, en fráfarandi formanni er ætlað að sitja sem meðstjórnandi í stjórn árið eftir að hann lætur af starfi formanns. Formannssæti má sami maður ekki skipa nema þrjú ár í senn.
5.2 Allir meðlimir Brunatæknifélagsins eru kjörgengir til stjórnar, að því tilskildu að a.m.k. 3 af 5 stjórnarmönnum í Brunatæknifélaginu skal einnig vera félagi í SFPE eða gerast aðili að SFPE við kjör. Hafi stjórnarmeðlimur ekki kost á greiðslu fyrir félagsgjald SFPE frá vinnuveitanda skal Brunatæknifélagið standa straum af félagsgjaldi, þó aldrei fyrir fleiri en þrjá stjórnarmenn að hámarki.
5.3 Stjórnin skal sitja eitt ár í senn og því aðeins að meðlimir viðstaddir aðalfund ákveði annað, eru allir stjórnarmenn kjörgengir til endurkjörs (sjá þó lið 5.1).
5.4 Tilnefning til stjórnar og skoðunarmanns reikninga skal borin fram á árlegum aðalfundi af einum meðlimi Brunatæknifélagsins og studd af öðrum.
5.5 Stjórn félagsins fer með málefni félagsins milli aðalfunda. Formaður boðar til stjórnarfunda. Firmaritun er í höndum meirihluta stjórnar.
6. Framkvæmdavald og skyldur stjórnar.
6.1 Stjórnin hefur heimild til að fela hvaða meðlimi Brunatæknifélagsins sem er sérstök verkefni á vegum stjórnar, eða til að fylla autt stjórnarsæti tímabundið. Kjósa skal nýjan stjórnarmann er á næsta aðalfundi.
6.2 Stjórnarfundur er ályktunarfær þegar minnst 3 eru mættir og getur samið eigin fundarsköp, önnur en að skipa formann, þegar annað hvort formaður eða varaformaður eru viðstaddir. Hún setur einnig starfsreglur fyrir allar undirnefndir sem hún skipar. Hún getur falið undirnefnd ákvörðunarrétt í einstökum málum.
6.3 Stjórnin annast allar eigur, fundargerðabækur og málefni Brunatæknifélagsins, og hefur á höndum allt vald félagsins, sem ekki er falið aðalfundi þess og er undanskilið með sérstökum samþykktum aðalfundar.
6.4 Stjórnin hefur vald til að samþykkja eða hafna umsókn hvaða einstaklings sem er án þess að tilgreina ástæðu fyrir afstöðu sinni og getur vikið úr Brunatæknifélaginu sérhverjum þeim er uppfyllir ekki félagsskyldur.
6.5 Stjórnin ákveður hvenær og hvar hún kemur saman, en ef ritari fær skriflega beiðni frá þremur stjórnarmanna um að boða til stjórnarfundar, skal hann gera það þegar í stað og hafa minnst 3ja daga og mest 7 daga fyrirvara.
6.6 Formaður og féhirðir skulu hafa umboð til að ráðstafa fjármunum Brunatæknifélagsins, en skulu gera stjórninni grein fyrir útgjaldaliðum.
6.7 Stjórn Brunatæknifélagsins er ábyrg gagnvart SFPE í þeim málefnum sem varðar SFPE Iceland Chapter.
7. Breytingar á lögum Brunatæknifélagsins.
7.1 Breytingar eða viðbætur við lög þessi má aðeins gera á aðalfundi Brunatæknifélagsins og verða þá að hljóta samþykkt að minnsta kosti tveggja þriðju hluta viðstaddra félaga til að öðlast gildi, enda hafi félögum Brunatæknifélagsins verið kynnt efni tillagnanna í aðalfundarboði.
8. Ráðstöfun á hagnaði
Rekstrarafgangi/hagnaði af starfsemi félagsins skal varið til viðburða, funda eða fræðslu í brunafræðum, forvörnum og slökkvitækni fyrir meðlimi Brunatæknifélagsins og samfélagið í heild, í samræmi við tilgang félagsins. Stjórnarmenn og félagsmenn njóta ekki fjárhagslegs ávinnings af starfsemi félagsins.
9. Slit félagsins
Ákvörðun um slit félagsins skal taka á aðalfundi með einföldum meirihluta atkvæða og renna eignir þess til þeirra góðgerðarmála sem ákveðin verða á slitafundi.
Samþykkt á auka-aðalfundi 2025